तळसंदे ! पर्यावरणाचा अनमोल ठेवा असलेल्या विष्णू तलावाकाठी वसलेले प्रागतिक विचारांचे एक समृद्ध गाव. धार्मिक, आध्यात्मिक, सामाजिक प्रबोधनाची परंपरा लाभलेले वारणा खोऱ्यातील एक वैशिष्ट्यपूर्ण गाव अशी तळसंदे गावची सार्थ ओळख आहे. ऐतिहासिक विष्णू तलावाच्या रूपाने समृद्ध अशा पर्यावरणीय परिसंस्थेचा अनमोल ठेवा तळसंदे गावाला लाभला आहे. ग्रामदैवत आई अंबाबाईचे पवित्र आशीर्वाद तळसंदे गावच्या माथ्यावर सदैव छत्र धरून आहेत. आधुनिक प्रबोधनाच्या विवेकी विचारातून झिरपलेला सार्वजनिक स्वच्छता, ग्रामसुधारणा आणि लोकप्रबोधन यांचा कृतिशील असा वारसा गावाने निष्ठेने जपला आहे. शेतीमधील पारंपरिक ज्ञानाला अत्याधुनिक तंत्राची जोड देत साधलेल्या प्रयोगशीलतेमधून तळसंदे गावाने देशभरात एक आपली नवी ओळख निर्माण केली आहे. कृषी आणि अभियांत्रिकी विद्यापीठ, विविध शैक्षणिक संस्था आणि निवासी संकुलांच्या विस्तीर्ण परिघात आज तळसंदे गाव एक परिपूर्ण शैक्षणिक केंद्र म्हणून आपला स्वतंत्र ठसा उमटवत आहे. आध्यात्मिक, सामाजिक, शैक्षणिक आणि प्रबोधनाचा वारसा घेऊन आजच्या काळात आधुनिक विज्ञानवादी विवेकी विचारांशी नाते जोडत तळसंदे गावाने एका समृद्ध भविष्याकडे आपला आश्वासक प्रवास सुरु ठेवला आहे.